Tilraunaverkefni: Klukkutími í leikfimi á dag!

[hjortur]

Ný dönsk-norsk rannsókn sem unnin var undir stjórn Lars Bo Andersen prófessors við Syddansk Universitet sýnir fram á mikinn mun á heilbrigði og námsárangri nemenda sem fá klukkutíma í leikfimi á dag. Í dag hafa nemendur tvo tíma á viku í leikfimi, líkt og hér á landi og varar prófessorinn við alvarlegu heilbrigðisvandamáli ef ekki er markvisst bætt úr hreyfingaleysi barna í dag.

Regluleg hreyfing barna minnkar verulega líkur á ýmsum lífsstílssjúkdómum eins og hækkuðum blóðþrýstingi, sykursýki 2 og hjarta- kransæðasjúkdómum. En regluleg hreyfing bætir líka námsárangur barnanna. Nemendur í 7. bekk í Skovlunde í Kaupmannahöfn eru orðin betri í lestri og skrift eftir að leikfimitímum var fjölgað og þau eru vel yfir landsmeðaltali. Þau hafa náð betri árangri í stærðfræði, dönsku og eðlisfræði enda hafa kannanir sýnt fram á að beint samhengi er á milli heilbrigðs líkama og námsárangurs. "Hraust sál í heilbrigðum líkama".

Danski menntamálaráðherrann er ekki viss um að lausnin felist í fjölgun leikfimitíma enda útheimti slíkt aukið fé og fleiri kennara. Ábyrgðin sé ekki síst foreldranna að tryggja hreyfingu barnanna.

Það væri áhugavert að heyra ykkar skoðun á þessu málefni og hvort einhverjir hafi verið að íhuga tilraunir með að fjölga leikfimitímum.

[Helga Gísla]

Gaman að heyra þetta og mjög trúlegt. Vert að athuga og fróðlegt að fylgjast með hvort einhverjir taki við sér.

[Gvendur göslari]

Það væri náttúrulega ágætis byrjun að fá foreldra til þess að senda börnin sín bara labbandi í skólann, en veri ekki alltaf að keyra þau út um allt. Börn eru óþreytandi ef að þau fá að hreyfa sig.

[Ragnheiður]

Hvar get ég séð þessa rannsókn?

[hjortur]

Sæl Ragnheiður

Ég las þetta í dönsku dagblaði. Ég skal athuga hvort ég finni ekki eitthvað um þetta á netinu.

[hjortur]

Hér er umræðan um þetta á danska dagblaðinu 24 timer:
http://www.24timer.dk/24t/forums/show/245/825.page

Annars geturðu líka bara prófað að senda Lars Bo Andersen tölvupóst en hann stóð fyrir rannsókninni. Netfangið er lars.bo.andersen (hjá) nih.no.

[Ragnheiður]

Sá sambærilega rannskókn í Danska sjónvarpinu.
Þeir sem hafa áhuga geta skoðað hér.
http://www.dr.dk/DR1/Aftenshowet/Pro...1026145940.htm

[Sesselja Guðmunds]

sammmála : að keyra börnin í skólann er óskaplega auðvelt og "öruggt" en þau börn eru ekki jafn vel vöknuð þegar þau koma í skólann. Líkamleg virkni hefur áhrif á einbeitingu og afköst á bóklega sviðinu.
Ég velti líka stundum fyrir mér hvort sérkennsla gæti oftar verið í gegnum hreyfingu eða tónlist, svo ég taki nú dæmi um það sem ég þekki best. Ég hef séð mun á illa stöddum börnum þegar þau fá að vinna með tónlist, en hef ekki kafað djúpt í rannsóknir um það efni.
Hafið þið prófað eitthvað svona "óhefðbundið"?
Kveðja
Sesselja

[hallajons]

Já, enn og aftur er bent á mikilvægi hreyfingar og tengingu þess við námsgetu. Heyr, heyr!

Ég hef fulla trú að óhefðbundnar aðferðir komi fleirum að gagni en þær hefðbundnu. Eftir því sem fjölbreytileikinn er meiri, hljóta líkurnar að aukast á að þú náir til sem flestra. Það hlýtur að vera hægt að gefa nemendum kost á að nema námsefnið á þann hátt sem þeim er eðlislægast. Fjölgreindirnar koma sterkt inn í þá umræðu. Eigum við ekki einmitt að stuðla að ræktun allra fjölgreindanna? Það er þó afar umdeilt og ég tala ekki af reynslu sem grunnskólakennari, því miður en hef alltaf heillast af fjölgreindunum og þeim möguleikum sem kennsluaðferðir tengdar því efni bjóða upp á. Sjálf vinn ég á leikskóla en er menntuð sem grunnskólakennari.